Síðan ég skrifaði síðast hefur lífið gengið sinn vanagang hérna í Noregi. Snjórinn er sem betur fer smám saman að fara í burt og hann er alveg farin af götunum og mestmegnis af göngustígunum þannig að nú get ég hjólað í vinnuna sem er þvílíkur munur J

 

Ég sótti hjólið fyrir tveimur vikum síðan heim til Röggu og þeirra, þar sem að það var kvöld og soldið hált úti þá fór ég með hjólið í strætó. Ég fór með hjólið inn að aftan og gekk svo fram til að láta kortið mitt í skannan og geng svo aftur til baka. Strætóbílstjórinn spyr ertu að fara í bæinn og ég segi bara já og geng áfram og hugsa á meðan, afhverju í ósköpunum er hann að spyrja mig að því. Svo talaði hann eitthvað meira þannig að ég hugsaði bara já hann hlýtur að vera að tala í símann eða eitthvað. Svo fer ég útúr strætó niður í bæ og tek annan strætó aðeins nær heimilinu mínu og þar segir strætóbílstjórinn heyrðu þú þarft að borga fyrir hjólið !!!! þá var ég s.s. búin að fara heila langa ferð í öðrum strætó  án þess að borga, var sko ekki að fatta að það kostaði fyrir hjólið hahahaha. Er búin að vera með samviskubit yfir þessu síðan L En svona getur maður verið vitlaus !!

Ég, Ragga, Ester og Kara erum búnar að skreppa tvisvar í mollið hérna. Það er frekar stórt og ég hef bara séð 1/3 af því þó svo ég hafi komið þarna inn tvisvar. Ég var svo heppin að ég rakst á brún leðurstígvél á 299 ( sem er 6000 þús.) íslenskar og auðvitað skellti ég mér á þau. Þegar að það koma svona góð tilboð þá er erfitt að sleppa þeim. Í seinna skiptið fórum við aftur í mollið vegna þess að það var auglýst frí dömuklipping á miðvikudögum til kl. 14 þannig að við drifum okkur aftur og ætluðum sko aldeilis að komast í fría klippingu en því miður þá var allt upppantað (auðvitað, heppnu við) og það er s.s. ekki hægt að fá bara að særa hárið heldur þyrfti að láta þær klippa mann einhverja svaka stílklippingu. Við þorðum því ekki alveg því þetta eru nemar og norsarar kannski ekki alveg með sama hárstíl og á Íslandi þannig að við vissum ekki alveg hvað við værum að fara útí. Það er svakalega dýrt að fara á hárgreiðslustofu hér og því best að vera bara með einfalda klippingu svo maður þurfi ekki að fara oft til þeirra. Enda ekki m jög margar konur hér með stutt hár.

Á sunnudag var aftur svipað fimleikamót og var um daginn en nú var það haldið í Mandal. Mandal er í ca. 50 mín ökufæri frá Kristiansand. Lítill og kósý bær. Mæting var fyrir utan fimleikahúsið hérna kl. 8 á sunnudagsmorgun og þar sem að það gengur engin strætó svona snemma á sunnudegi að þá ákvað ég að hjóla. Sem betur fer er búið að vera hiti yfir frostmarki hérna síðustu 2 vikur og því ekki hálka á götum og göngustígum, þó svo að það sé enn ágætlega mikið af snjó. Ég er rúmlega 12 mín. að hjóla að heiman og í vinnuna sem er mjög fínt J Strætókortið mitt er útrunnið en það kostar 740 norskar krónur ótakmarkað mánaðarkort, ég þarf að reikna út hvort að það svari kostnaði að hafa það eða hvort ég eigi bara að hjóla og ganga og borga svo bara stakt gjald í strætó þegar ég þarf þess. Reyndar mjög þægilegt að geta hoppað uppí strætó hvenær og hvar sem er.

Íbúðin mín er orðin ágætlega heimilisleg, en á þó eftir að hengja upp myndir þegar ég er búin að ákveða hvar ég ætla að skella þeim upp. Ég man ekki hvort ég var búin að setja hérna inná síðuna að það fylgdu 2 blóm með íbúðinni, ég er sko snillingur í að drepa blóm en er búin að leggja mig 100% fram við að halda lífi í þessum blómum. Fyrst hélt ég að þau hefðu skilið eftir 1 ekta blóm og 1 gervi ehemm, fattaði allt í einu að gerviblómið var orðið ansi veiklulegt L og er búin að gera mitt besta síðan þá að halda í því lífi, það lítur ekki enn eins vel út og fyrst en það er allavega á lífi. Úff greyið þau að hafa treyst mér fyrir blómunum hahahah er algjör blómaböðull. Ég hélt ekki einu sinni lífi í kaktusnum mínum sem ég átti þegar ég flutti fyrst að heiman og ekki þarf kaktus mikið vatn.

Ég er ennþá mjög ánægð í vinnunni og hef aðeins verið að fá meiri vinnu. Ég hef kennt einn palla og styrktartíma í Trivsel (sem er stöðin nálægt Röggu og þeim, soldið frá mér) og svo verð ég vikar (afleysing) með seniortrim á miðvikudagsmorgnum hérna rétt hjá mér J Seniortrimið sem ég er með hérna á miðvikudögum er mjög sniðugt. Þau byrja á styrktaræfingum (sem eru reyndar aðeins léttari en ég hef verið með) en svo í hálftíma fara þau í bandý eða blak. Sú sem er með þetta byrjaði á þessu fyrir mörgum árum síðan og það tók víst soldið langan tíma til að fá þau til að drífa sig að spila og það er frábært að sjá hvað þau hafa gaman af þessu. Þetta er blandaður hópur af konum og körlum og þau eru um 50-60 stk sem mæta en 100 eru á listanum. Svo er opið hús fyrir þau 2 í viku í viðbót þar sem þau mæta bara sjálf og geta farið í bandý eða blak. Hérna í Noregi er svakalega mikið lagt uppúr seniortrimi og það eru æfingar fyrir eldra fólk útum allt h érna og í öllum hverfum enda eru þau svakalega spræk miðað við aldur. Elsti maður sem ég er með í seniortriminu mínu er 88 ára gamall og þvílíkt sprækur, hann hleypur útum allt og er í svaka góðu formi. Flestir af þessu fólki er búið að vera í þessu í mörg ár og kjarninn því orðin góður J Finnst þetta svo frábært því að þetta bætir lífsgæði þessa aldurshóps svo mikið, fá líkamlega, félagslega og andlega svo mikið útúr þessum æfingum.Ég myndi segja að það væri gott að vera gamall hérna í Noregi. Almenna hreyfing fólks hérna er miklu meiri en á Íslandi, enda ganga allir mikið eða hjóla. Ásamt því auðvitað að fara á gönguskíði sem flestir Norsarar hafa gert frá því þeir byrjuðu að ganga. Langar svakalega mikið að fara á byrjendanámskeið á gönguskíðum hérna og hef verið að reyna að finna það.

Ég er einnig með karlmenn 50-60 ára í þjálfun tvisvar í viku og þeir eru svo frábærir, svaka hressir. Ég læt þá gera styrktar- og þolæfingar í 45 mín og svo skiptum við vellinum í tvennt og helmingurinn spilar körfubolta og helmingurinn bandý og svo er skipt. Þetta er þvílíkt stuð og frábært að spila með þeim J og þeir eru svaka hressir.

En annars er nú lítið annað að frétta nema jú það sprakk á hjólinu í dag L þarf að skella mér í bæinn til að kaupa bætur svo ég geti lagað dekkið. Nú væri gott að eiga kall sem gæti hjálpað mér við svona viðgerðardæmi

En nú er ég hætt í bili

 

Úff allt á kafi allstaðar, búið að snjóa heilan helling síðan síðustu helgi og allt í sköflum hérna, yndislegt að hafa snjóinn en ég hlakka ekki til þegar það kemur hláka, spurning hvort maður verði ekki að fjárfesta í stígvélum fyrir það

Síðasta sunnudag var fimleikamót í Gimlehallen (Gimlehallen er stórt íþróttahús sem er við fimleikasalinn). Það var án efa skrýtnasta fimleikamót sem ég hef nokkurn tímann farið á. Þetta var hópfimleikamót þar sem að keppt var eins og á túrneringu í handbolta eða fótbolta. sem sagt 2 lið kepptu á sama áhaldi og það lið sem fékk hærri einkunnir á því áhaldi fékk 2 stig og svo koll af kolli. Það voru fullt af liðum og því ekki hægt að klára mótið og verður það klárað í tveimur pörtum í viðbót. S.s. 2 mót í viðbót með þessu bjánalega keppnisfyrirkomulagi og var þetta mót númer 2. Þetta fyrirkomulag þekkist ekki hérna en það ákvað einhver pabbi í Arendal að hafa svona svakalega sniðugt mót, liðin þurfa að keppa nokkrum sinnum á áhaldi og eru því svakalega þreytt eftir daginn og lýkur á slysum miklar því að erfitt er að halda einbeitingu  þegar þú keppir 3 sinnum á dýnu og 3 sinnum á trampolíni. Allir þjálfarar og keppendur eru á móti þessu fyrirkomulagi og ég vona að svona mót verði ekki næsta vetur.

Annars er ég ennþá mjög ánægð í vinnunni og er að fara að tala við Trivsel (líkamsræktarstöð sem er í Vågsbygd) á mánudaginn því að fimleikadeildin á þá líkamsræktarstöð og ég fæ meiri vinnu þar varðandi Oxigo stöðina sem er í hverfinu mínu að þá er allt gott að frétta þaðan Ég hef verið að æfa þar og á von á að fá fyrst afleysingar þar og svo fasta tíma sem er æðislegt því ég er virkilega að fýla tímana þarna, þeir eru mjög skemmtilegir og góðir.

Í dag skruppum við í Ikea á "nýja" bílnum þeirra Röggu og co. og shhhhiiii hvað það er stórt, hefði nú alveg viljað vera með hlaupaúrið á mér og mæla hvað maður gekk langt í gegnum búðina. En ég verslaði inn ýmislegt sem mér vantaði t.d. hirslu undir rúmið, ruslafötu, pönnu og eldföst mót. Prófaði svo að kaupa inn frosnar sænskar kjötbollur og elgs lasagna, verður gaman að smakka. Við keyrðum framhjá mollinu og shhhiiiii það er líklega helmingi stærra en Kringlan og verið er að byggja við þannig að það á að stækka það enn meira. Á eftir að taka mér dag í að skoða það en ekki strax því að norsku peningarnir eru ekki farnir að streyma inn Ég er búin að fá laun einu sinni en þau fara beint í leigu enda var ég ekki í 100 % starfi í janúar en þetta kemur allt saman fyrstu vikuna í mars er vetrarfrí hjá öllum skólum og ég sagðist ekki vilja vera í vetrarfríi þá enda er ég á tímakaupi og vill bara vinna sem mest en ég verð að þjálfa þá sem verða heima þessa viku sem er fínt, byrja bara aðeins fyrr að vinna og er búin fyrr, bara næs

en nóg í bili endilega skrifið í gestó

Kveðja Ólöf

Jæja þá er fyrsti mánuðurinn í Noregi liðin og nokkrir dagar aukalega við það Danmerkurferðin var bara fín, krakkarnir voru eins og englar og allir gerðu einhverja nýja æfingu í fyrsta skipti bara stuð. Ég hafði smá áhyggjur af að verða sjóveik í bátnum en þetta var ljúf sjóferð báðar leiðir, fann lítið fyrir því að vera á skipi. Í bátnum er hægt að versla Tax free vörur og er skipið mjög flott í alla staði, hér er linkurinn á heimasíðuna http://www.colorline.no/ næs að geta bara skroppið til Danmerkur í dagsferð

Síðasta vika fór svo í að koma mér fyrir í nýju íbúðinni og ég fór m.a. í bæinn og verslaði mér þurrkgrind og tók hana með í strætó

Í fyrradag sendi ég svo CV mitt á þessa líkamsræktarstöðhttp://www.oxygo.no/ því mig langar til að æfa þar og þá er fínt að fá að kenna kannski 1-2 tíma í viku og geta æft líka frítt Ég fékk svar strax og fór í spinning tíma þarna í dag, og vá hvað stöðin er flott, útsýnið af hlaupabrettunum og úr æfingasalnum er geggjað, maður sér beint útá sjóinn. Ég talaði við framkvæmdarstjórann í dag og á að mæta í alla þá tíma sem ég get í næstu viku og svo byrja í afleysingum og ef þeim líkar við  mig að þá fæ ég fasta tíma líst svakalega vel á þetta og fínt að fá að æfa þarna enda allt til alls þarna og bónusinn er að ég er 10 mín að labba í þessa stöð. Er ennþá  með kort í Trivsel en ég þarf að taka 2 strætóa þangað og ganga líka þannig að það er aðeins meira maus og því betra að vera á þessum stað að æfa. Á þó von á því að fá líka einhverja vinnu í Trivsel sem er bara fínt

Annars er lífið bara gott, þarf að vera duglegri að taka myndir, eða allavega að taka með mér myndavélina svo ég noti hana einhvern tíma Á morgun er ég að fara á fimleikamót þannig að það verður bara rólegt kvöld, fæ mér bara einn bjór og kósí, þarf svo klárlega að fara að kynnast fleira fólki hérna í Kristiansand en það kemur vonandi með hækkandi sól.

En þangað til næst
ha de bra

Jæja þá er ég flutt til Noregs, finally og tilefni þess ætla ég að byrja aftur með þetta blogg mitt svo þeir sem vilja geta fylgst með lífinu hérna í Noregi

Það hefur mikið gerst á þessum tæpu 3 vikum síðan ég flutti hingað. Ég byrjaði að vinna hjá fimleikadeildinni hér strax morguninn eftir að ég kom út og stökk bara strax útí djúpu laugina og ákvað bara að tala norsku strax. Hjá fimleikafélaginu er ég að þjálfa áhaldafimleika, trompfimleika, barnafimleika og svo er ég með seniortrim kvenna og karla sem er leikfimi fyrir 50 ára og eldri. Einnig tók ég að mér palla og styrktartíma og á von á því að taka fleiri svoleiðis tíma að mér ásamt smá vinnu í líkamsræktarstöðinni sem fimleikafélagið á líka. En ég fékk líka ókeypis æfingakort þar en líkamsræktarstöðin er í Vågsbygd þar sem Ragga og co. búa. Ég er svakalega ánægð í vinnunni minni og hafa þau tekið svakalega vel á móti mér og vilja gjörsamlega allt fyrir mig gera. Einnig er fólk alltaf að hrósa norskunni minni en ég held að það sé bara að reyna að vera næs hahahaha allavega vantar mikið uppá orðaforðann.

Fimleikafélagið bauðst til þess að auglýsa eftir íbúð fyrir mig á finn.no og ég fann íbúð strax 2 dögum seinna, enda frábær meðmæli að fimleikafélagið auglýsi eftir íbúðinni. Í gær þá var stefnufundur hjá fimleikafélaginu og þau vildu endilega að ég myndi mæta á hann og á fundinum voru ég ásamt 3 þjálfurum félagsins (sem þjálfa mest) og stjórn fimleikafélagsins. Fundurinn var á svaka flottu hóteli hérna í Kristiansand og í kvöldmat var þríréttuð máltíð og rauðvín og bjór með. Eftir kvöldmatinn var svo bara farið aftur í fundarherbergið og haldið áfram með stefnu og framtíð félagsins og drukknar 2 rauðvínsflöskur til. Þetta var mjög skemmtilegt kvöld og fróðlegt og ég þurfti ekki að borga krónu fyrir þetta.

Ég er búin að búa hjá Röggu og co. allan tímann en flutti í litla sæta íbúð í Lund Kristiansand í dag. Ester dóttir Röggu var svo yndisleg að lána mér herbergið sitt og þau öll eru búin að vera frábær og gestrisin og eiga heiður skilinn að nenna að taka mig svona inná heimilið þeirra í næstum 3 vikur. Flutningurinn hefði verið miklu erfiðari ef ég ætti þau ekki að hér

Íbúðin sem ég er að leigja er alveg við sjóinn og það er fritidsbad mínútu frá húsinu mínu og strönd 5 mín. frá. Íbúðin er neðri hæð í fallegu húsi og búa eigendurnir hérna fyrir ofan mig. Einnig er smábátahöfn hérna rétt hjá og útsýnið frábært yfir höfnina. Ég er með minn eigin lítinn einkagarð hérna baka til og hlakka mikið til að kaupa mér grill og garðhúsgögn  Eigendurnir eru hjón um sextugt og svakalega indæl og vilja allt fyrir mig gera. Íbúðin er öll nýuppgerð, allt glænýtt þar á meðal uppþvottavél, þvottavél, sturtan, ísskápur ásamt eldhúsinnréttingu og gólfefnum. Innifalið í leigunni er einnig internet, grunn sjónvarpspakki, sjónvarp, skóhilla, fatahilla, fataskápur, sófi, sófaborð, eldhúsborð og stólar og svo voru þau svo indæl að láta mig fá handryksugu, hitakönnu, töfrasprota og ýmiskonar eldhúsáhöld og blóm til að lífga uppá íbúðina

Næstu helgi fer ég til Danmerkur með trompfimleikana í æfingabúðir yfir helgina og hlakka ég til að skoða aðeins þar en þetta er nóg í bili

Kveðja
Noregsfarinn

 

1) Hringdu í/eða heimsæktu afa þinn og/eða ömmu
2) Brostu til ókunnugra – ef að þú brosir færðu örugglega bros til baka.
3) Bakaðu yndislegt brauð
4) Skoðaðu gamlar myndir úr sumarfríinu
5) Fáðu þér kaffi með vinkonunni þinni
6) Fáðu þér eitt rauðvínsglas
7) Nudd – plataðu kærastann til að bjóða þér uppá eða í nudd
Farðu í göngutúr í birtunni – minnsti sólargeisli gefur orku
9) Farðu í gott bað
10) Hlæðu og vertu hress
11) Blóm – keyptu handa þér blóm eða færðu vinkonu þinni þau
12) Vertu hugmyndarík – saumaðu kjól, föndraðu eyrnalokka eða málaðu mynd.
13) Leggðu plön fyrir helgina
14) Gefðu sjálfri þér 5 hrós og meinaðu það
15) Farðu í bíó
16) Farðu á bókasafnið og fáðu góða bók lánaða
17) Hrósaðu vinkonu/m þinni/þínum
1 Prófaðu nýja íþróttagrein
19) Hlustaðu á tónlist
20) Keyptu flott naglalakk og lakkaðu neglur og táneglur
21) Skrifaðu bréf
22) Taktu áhættuna og gerðu eitthvað sem þig langar til en hefur aldreið þorað
23) Ef þú átt barn eða getur fengið eitt lánað – eyddu degi með barninu
24) Kysstu
25) Útbúðu "brunch" og lestu gott dagblað
26) Kveiktu á kertum
27) Taktu til í skartgripaskríninu þínu og skoðaðu hvað þú átt mikið skart
2 Liggðu í leti og slappaðu af
29) Keyptu gott súkkulaði
30) Dansaðu í stofunni

Jæja þá er ég komin heim frá Krít.  Þetta er fallegasta land sem ég hef komið til.  Ég skemmti mér mjög vel og slakaði vel á þarna úti.  Ég ætla bara að stikla á stóru á því sem var gert og svo kíkið þið bara á myndirnar í myndablogginu mínu því að þær segja eiginlega alla söguna.  Það eru 2 albúm á myndablogginu frá Krít.

Það sem var m.a. gert var farið í göngu í stærsta gljúfur í Evrópu-Samaría heitir gljúfrið.  Fórum í dagsferð til eyjunnar Santorinni en það er fallegasta eyja og krúttlegustu hús sem ég hef nokkurn tímann séð.  Svo fór ég að kafa með Kjartani og Breka, það var svakalega skemmtileg upplifun, verst að eiga ekki myndir á netið af því, ég á pottþétt eftir að prófa að kafa aftur  Svo fórum við líka í Gokart, horfðum á Zorbadans og unnum maraþonið í sólbaðslegu ásamt því að vinna átkeppnina

Ég átti afmæli úti og bauð mamma mér og ömmu að borða á mjög góðum veitingastað, þar var einnig sungin afmælissöngurinn handa mér og ég fékk afmæliskokteil
Takk elsku mamma fyrir frábæran dag

Ég á pottþétt eftir að fara til Krítar aftur en þá verður það með kærasta því að Krít er mjög rómantískt land og held ég að það sé frábært að fara þangað með kærasta.

Núna er bara æft á fullu og þessi vika fer í að hætta að borða nammi, gos og allan sykur. Hef einnig minnkað brauðát.  í Næstu viku verður farið ennþá harðar í mataræðið og brennsluna því að nú styttist víst í Fitness

Jæja þá er komið að sögunni frá Hell weekend.

 Við byrjuðum á að hittast vinahópurinn á Red Chili til að hlaða fyrir átök helgarinnar, það var komin mikill spenningur í liðið og stress í suma.  Rétt fyrir kl. 16:00 fórum við niður í Boot Camp og biðum þar til að fjörið myndi byrja.  Kl. 17:00 var okkur sagt að setjast inní salinn og þar kynntu Navy Seals þjálfararnir sig (ég reyndar þekkti þá frá því í fyrra) og við horfðum einnig á myndband varðandi Hell week sem þeir eru með úti.  Eftir ánægjulega kynningu þá byrjaði sko fjörið.  Við áttum að búa til stærðarröð og það tókst ekki á tilsettum tíma og þurftum við því að “droppa” í gólfið í armbeygjustöðu.  49 manns voru mættir og voru armbeygjustöðurnar alveg í klessu á gólfinu en þar þurfum við að gera 30 armbeygjur við talningu frá Sveinbirni en hann var valinn til að vera Classleader ásamt Ómari.  Þá var það taka 2 og ekki tókst hún betur, fengum 30 armbeygjur í viðbót.  Í 3 tilraun þá tókst okkur loksins að búa til rétta stærðarröð.  Ég lenti í hópi 2 og var valin sem Boatcrewleader yfir þeim hópi.   Ég fékk nettan fiðring í magann af stressi að þurfa að stjórna einhverju en hópurinn var svo frábær að það gekk mjög vel að vinna saman.  Þegar búið var að raða öllum niður þá skriðum við út og upp í rútu, leið okkar lá niður í Sundhöll.  Í sundhöllinni var m.a. tekið sundprófið (500 metrar á tíma) og ég held að ég hafi náð rúmlega 9 mín.  Var allavega 2 á eftir Rögnvaldi úr liðum 1,2 og 3.  Svo hoppuðum við niður af stóra brettinu, fórum út í kuldann, fórum í boðsund (mitt lið vann fyrsta boðsundið og slepptum við næsta því að “it pays to be a winner”  Einnig var bjarnaganga og krabbaganga á bakkanum á meðan sprautað var köldu vatni á okkur.  Svo þurftum við að hoppa útí með bundnar hendur og þar þurftum við að láta okkur fara niður á botn og upp aftur nokkuð lengi.  Eftir það þurftum við að troða marvaða með öllum á miðjubrautinni, það var rosalega erfitt því að maður var sífellt að sparka í hina því að plássið var lítið, svo hentu þeir stórum teningum útí sem átti að halda á lofti og lóðum. 

 

Eftir langan tíma í Sundhöllinni var svo haldið uppúr og útí rútu.  Þar ætluðu einhverjir að gæða sér á orkusúkkulaði sem þau höfðu smyglað með í ferðina en NEI það var sko ekki hægt, við þurftum að halda höndunum upp fyrir höfuð alla leið niður í Nauthólsvík.  Þar fengum við dýrindis máltíð sem samanstóð af hráu eggi og bökuðum baunum. Svo byrjaði helvítið fyrir alvöru, við skriðum á malbiki, möl, grasi, sandi og áttum svo að fara úti sjó og bleyta okkur og velta okkur svo uppúr sandinum (“get wet and sandy”) Þarna gerðum við endalausa spretti, hjólbörur, drógum hvort annað í sandinum, armbeygjur, hnébeygur, armbeygjuhopp og allar æfingar sem Kory datt í hug að láta okkur gera og alltaf þurftum við að bleyta okkur og setja sand á milli.  Það var sem betur fer stillt veður en við vorum að krókna úr kulda enda bara á hermannabuxum og hvítum stuttermabolum sem voru eiginlega ekki hvítir lengur.  Eftir margra klst. æfingar í sandinum þá var skokkað af stað einhverja 6-8 km.  Þetta skokk var mjög kærkomið því að þá náði maður í sig hita aftur.  Þarna héldu margir að sandævintýrið væri búið en NEI það var sko ekki búið, við gerðum drumbaæfingar, fórum aftur útí sjó mörgum sinnum og gerðum fullt af öðrum æfingum í viðbót, ásamt mörgum keppnum.  Inn á milli fengum við smá pásur og þá fengum við álteppi (spaceblanket) til að hlýja okkur.  Þarna voru allir bara farnir að kúra saman, maður lá í faðmlögum við fólk sem að maður þekkti lítið fyrir bara til að halda á sér hita. Í “kúrinu” þá peppuðum við hvort annað upp enda vorum við nú þegar búin að missa einn úr liðinu okkar (team 2) vegna meiðsla.  Eftir næstum 12 tíma í Nauthólsvíkinni þá fengum við að fara í kærkomna sturtu enda var maður orðin mjög kaldur en þá voru 6 manns hættir og margir búnir að ganga upp að þjálfurunum og ætluðu að hætta en hættu sem betur fer við það. Sturtan var æðisleg, það var frábært að komast úr blautum og söndugum fötunum, sturtan var reyndar bara ylvolg en vá hvað hún var góðJ Eftir þetta fengum við að borða, matseðillinn var s.s. brauð með skinku og osti, kleinur, möffins, súkkulaðikökur, Gatorade og vatn og átti þetta eftir að vera matseðill allrar helgarinnar.  Maður hámaði í sig af bestu lyst enda vissi ég að mér veitti ekkert af orkunni.  Þá kom rútan og við héldum að við ættum að fara með henni en NEI dótið okkar fékk að fara í rútuna en okkur var smalað í sendiferðabíl eins og rollum og sátum við þar á gólfinu í kúri til að halda á okkur hita.  Við máttum nefninlega ekki vita hvert ferðinni var heitið.  Þarna náði maður að dotta þrátt fyrir þrengsli og loftleysi.  Áfangastaðurinn var Saltvík og þá tók miklu skemmtilegra við.  Við áttum að fá að síga niður af ca. 10 metra hárri byggingu sem þarna var, úff ég sem er svo lofthrædd en maður yfirvann það eins og svo margt annað þessa helgi, fékk þó tár í augun þegar ég átti að fara yfir brúnina.  Við sigum 3 sinnum og voru næstu 2 skipti miklu skemmtilegri. Eftir þetta var Monstermash keppni en hún var þannig að hlaupið var 2-3 km. svo skriðið í grasinu, næst klifraður kaðall eða stigi, hlaupið yfir drumba, skriðið undir hindrun, gengið á höndum yfir lárétta rimla, klifrað upp vegg með kaðli, komið sér yfir háan láréttan staur-hangið lárétt í kaðli og svo klifrað uppá háan vegg, þarna kom sér vel að hafa Ása sem swimbuddy því að ég náði ekki upp þannig að hann lánaði mér hendur til að klifra uppá.  Svo var hlaupið eftir grýttum vegi og fjörunni niður að Boot Camp flagginu þar áttum við að vaða útí sjó að mitti og vaða til móts við næsta Boot Camp fána þá máttum við fara uppúr.  Svo var skokkað til baka að litlu húsi sem við þurftum að skríða inní þar inni voru ýmsar hindranir, ég og Ási villtumst aðeins í húsinu en náðum loks út á réttum stað og gátum farið í sigið. Þarna fannst manni ekkert mál að fara í sjóinn því að hann kældi mann niður eftir hlaupin.

 

Þjálfararnir buðu okkur hvort að við vildum taka brautina aftur og reyna að bæta tímann okkar eða fara í annað verkefni.  Allir völdu að taka brautina aftur því að þrátt fyrir að hún væri erfið vegna þreytu að þá var hún rosalega skemmtileg.  Ég og Ási náðum að bæta okkur í seinni ferðinni og vorum himinlifandi með þaðJ Eftir þetta fengum við að borða aftur (sami matseðill og áður) og svo var haldið í skokk, ég klæddi mig í næstum öll mín föt því að það var mikill hrollur í mér, mér hlýnaði þó fljótt á hlaupunum.  Við hlupum alveg að Esjunni og þar gengum við upp Esjuna, ég held að kl. hafi verið að nálgast miðnætti þegar við vorum komin á toppi Esjunnar, það var frábært útsýni og ég virkilega naut þessa kafla.  Við fórum þó varlega í klettunum enda búin að vera vakandi í 1 og ½ sólarhring.  Þokan læddist yfir þegar við vorum á leið niður Esjuna en hún var ekki það þykk að við rötuðum alveg niður. Uppi á Esjunni þá leið næstum yfir einn því að hann varð allt í einu mjög orkulaus, við náðum þó að leiða hann upp að steini og hlýja honum, ég fann orkukubb í vasanum sem Maja hafði gefið mér fyrr um kvöldið og við létum hann borða það, Rósi myndatökumaður var einnig með orkusúkkulaði sem við létum hann borða.  Það var mjög óhugnalegt að sjá hann, hann var eins og blindfullur og maður sá í hvítuna í augunum.  En sem betur fer hresstist hann og þjálfararnir fóru með hann niður.  Ein stelpa varð líka orkulaus á leið niður og þurfti að bera hana restina af leiðinni.  Eftir .þetta var haldið í Saltvík og svo brunað niður í Boot Camp þar sem að beið okkar þrekprófL  ekki gekk það nú frábærlega eftir átök helgarinnar, en maður vissi þó að helvítinu var að ljúka þó svo að við bjuggumst flest við því að þurfa að gera eitthvað meira og voru allir tilbúnir að stökkva aftur í sjó og sand.  Það var frábært hvað samheldnin var mikil í hópnum og hef ég aldrei kynnst jafn skemmtilegum liðsanda og þessa helgiJ  Takk fyrir mig allirJ

Úff ég er búin að hvíla síðan á þriðjudag, á mánudag mætti ég á Boot Camp æfingu og svo skokkuðu ég og Kristín rúmlega 6 km á þriðjudaginn.  Síðan þá er ég bara búin að liggja nánast með tærnar uppí loft.  Vá hvað maður verður latur á að gera ekki neitt, varla búin að lyfta fingri hérna heima, (tók reyndar til en það var eiginlega bara kattaþvottur)  Ég er komin í mikla hreyfingarþörf núna, get ekki beðið eftir að hreyfa mig

Hell weekend byrjar sem sagt á eftir, það verður gaman að sjá hvernig helgin verður núna.  Er bara farin að hlakka til, enda spáin góð og rosalega skemmtilegur hópur samankomin um helgina
Fyrir svona þremur vikum þá hugsaði ég mikið um afhverju í ósköpunum ég væri að fara aftur að láta pína mig svona, maður er greinilega ekki vitrari en þetta  En núna hlakka ég bara á að takast á við áskorunina og það verður gaman þegar þetta er búið

Á miðvikudaginn er það svo bara Krít ætla að reyna að hugsa um sólarströnd þegar við liggjum í köldum sjónum með öskrandi hermenn allt í kring

Sagan af Hell weekend kemur svo inn eftir helgina

Æfingavikan var sem hér segir:

Mánudagur 7 júlí Boot Camp æfing

Þriðjudagur 8 júlí gerði fótaæfingu dauðans sem að Robbi lét mig fá. Hjólaði líka 13 km.

Miðvikudagur 9 júlí Boot Camp æfing og 10 km hlaup

Fimmtudagur 10 júlí Upphífingarpíramídi þ.e.100 upphífingar, 200 armbeygjur og 300 uppsetur.  Synti einnig 500 metra

Föstudagur 11 júlí Boot Camp æfing

Laugardagur 12 júlí  2 klst. útiæfing

Sunnudagur 13 júlí 1000 metra sund.

í gær þá skruppum við skvísurnar í stelpujeppaferð í Þórsmörk til að taka á móti laugavegshlaupurum.  Það var hellidemba og rok í Þórsmörk þegar við mættum á staðinn.  Sveinbjörn og Börkur voru þá þegar komnir í heitapottinn en svo tíndust inn restin af Boot Cömpurunum.  Ég setti inn myndir af ferðinni á myndabloggið.  Í dag er ég í letistuði enda komin í sumarfrí og ætla bara að njóta þess að slappa af í fríinu.  Næstu helgi er svo HELL WEEKEND þar sem að verða 36 klst. stöðugar æfingar án þess að sofa.  Vona að ég sé betur undirbúin en í fyrra fyrir átökin, þetta verður bara gaman

jæja áfram með æfingadagbókina

Fimmtudaginn síðasta þá var mjög skemmtileg Elítuæfing með drumba, alltaf jafn fyndið að sjá andlitið á fólkinu þegar við löbbum yfir götuna með drumbana.  Á föstudeginum fór ég á Boot Camp æfingu og á laugardeginum var tekin tvöföld Boot Camp æfing og svo seinna um daginn þá löbbuðum við nokkur saman á Keili.  Eftir Keili var farið í sund og svo farið heim til Erlu að grilla, frábær dagur Á sunnudeginum fór svo vinahópurinn saman í sund (synti 500 metra), út að borða og í ísbíltúr  Ég er búin að setja inn myndir af Keilisferðinni inná myndabloggið.

í dag var svo seinni vikan á sundnámskeiðinu, ég er s.s. að kenna sund núna í sumarfríinu mínu.  Tók að mér 2 vikur, fínt að fá auka peninga í kreppunni.  Hlakka samt soldið mikið til að fá alveg frí.  Núna fer líka að styttast í Hell weekend og svo Krít lovely

Í dag kenndi ég s.s. 6 x 40 mín ofaní sundlaug og fór svo sjálf í sund í 2 klst. því það var svo gott veður, ætti að vera orðin mjög hrein eftir daginn

Jæja endilega kíkið á myndirnar en spurning vikunnar er s.s. Hvort á ég að vera í viku eða 2 vikur á Krít?

Úff hvað maður er búin að vera þreyttur og skrýtinn í byrjun vikunnar.  En vonandi fer þetta að lagast

Mánudagurinn var bara tekin í hvíld enda maginn eitthvað skrýtin eftir helgina

Í gær þá fór ég á Boot Camp æfingu og svo tókum ég, Hildur Edda og Benni upphífingarpíramídann sem er á SAC æfingablaðinu.  Þetta er í annað skiptið sem við tókum þennan píramída og hann var helmingi léttari núna en í fyrsta skiptið, alltaf gaman þegar maður sér svona áberandi mun.  Nú fer að styttast í Hell weekend og núna er ég að verða pínu stressuð, maður er búin að æfa eins og berserkur síðustu mánuði og þreytan aðeins farin að segja til sín.  Hef samt alveg passað mig að taka rólegri æfingar inná milli.  Skrýtið að vera stressuð núna þegar ég var ekkert svo stressuð fyrir síðusta SAC kannski útaf því að maður veit að þetta verður meira líkamlegt núna og metnaðurinn að drepa mann Þessi mynd hér að ofan er af okkur skvísunum í Leggjarbrjótsferð sem var farin með Boot Camp 16 júní síðastliðinn.

Jæja æfingavikan var bara fín. Á mánudeginum tók ég þátt í jónsmessuhlaupinu. Ég ákvað að taka bara þátt í 5 km að þessu sinni, er búin að vera að bólgna aðeins upp í hnénu.  Ég náði tímanum 23,25 og varð í 3 sæti í mínum aldursflokk sem var bara gaman því að hlaup er ekki alveg mín sérgrein  Á þriðjudeginum þá hjólaði ég 16 km og fór á Elítubootcamp æfingu sem var rosalega skemmtileg  Á miðvikudeginum fór ég á BC æfingu og hlaupaæfingu en þennan daginn var hlaupið samtals 12 km.  Á fimmtudeginum ákvað ég að hvíla alveg og hjólaði svo 16 km á föstudeginum og synti 500 metra til þess að reyna að ná úr mér sperrunum eftir Elítuæfinguna.

Um helgina var svo Fimmvörðuhálsferð með Boot Cömpurum. Rosalega skemmtileg ferð.  Við vorum nokkur sem að ákváðum að hlaupa og náði ég að fara yfir á 3:40 sem ég er mjög ánægð með.  Þar sem að ég var ekki á alveg jafn hröðu tempói og hin þá var ég ein frá skálanum og naut þess mjög að vera svona ein í heiminum.  Ég setti bara Ipodinn á fullt og söng hástöfum, frekar næs  Það var nú reyndar soldið fyndið þegar ég mætti fjölskyldu á leiðinni þar sem að þau fengu að njóta þess að heyra mig "öskra" Sódóma fullum hálsi, held að þau hafi bara verið nokkuð hrædd við þessa fölsku manneskju

Það eru komnar myndir á myndabloggið af ferðinni sem að Kristín tók og svo setti ég líka inn myndir af Esjuferð sem ég fór með 5 tindum í vetur

tata

Fimmtudagur 19 júní hjól 21 km

Föstudagur 20 júní sund 500 metrar og Boot Camp æfing

Laugardagur 21 júní Boot Camp æfing og svo brunað í brúðkaup til Önnu og Begga

Bæ í bili

'Eg ætla að reyna að standa við það og skrifa niður æfingarnar hérna svo ég sjái hvað ég er að æfa mikið. 

Miðvikudagur:  Boot Camp æfing kl. 17:00 og svo hlaupaæfing kl. 20:00 í dag var einungis hlaupið 4 km því ég var að hjálpa Hildi Eddu og Erlu með elítuna.

Kv. Ólöf

Jæja núna ætla ég að reyna að koma æfingunum mínum hérna inn svo ég sjái hvað ég er að æfa mikið

í gær mánudag þá fór ég á BC æfingu kl. 16:00 og fór svo leggjarbrjót í gærkveldi sem er 16 km ganga frá Þingvöllum til Hvalfjarðar.  Rosalega falleg leið, sérstaklega þegar maður labbar niður í Hvalfjörðinn.

Í dag (17 júní) þá hjólaði ég niður í Boot Camp til að hlaupa með Kristínu, Annasi og Erlu.  Við hlupum rúmlega 16 km. Svo fórum við í sund og tönuðum okkur aðeins Eftir það hjóluðum ég og Hildur Edda niður í bæ til að kíkja á hátíðahöldin, eftir smá dútl í bænum þá hjóluðum við heim á leið.  Þannig að í dag hjólaði ég 17 km Fínn dagur en nefið soldið mikið rautt eftir sólina sem var í allan dag